10 сотық жер беруде қандай кедергілер бар?
Сенаттың жалпы отырысынан кейін тілшілер палата төрағасынан қазақстандықтар 10 сотық жерді алуға белсенді түрде құжат тапсыруына қатысты сұрақ қойды. Сенат төрағасы Мәулен Әшімбаевтың айтуынша, әр азаматқа жер телімдерін бергенде коммуникацияларды тарту мәселесі бар, деп хабарлайды Экспресс К.
"Жер учаскесіне өтінім беруге әр азамат құқылы. Негізі, елімізде жер баршылық, бұл тұрғыда адамдарға дұрыс түсіндіру керек. Қазақстан аумағы ауқымды, территория жеткілікті, 10 сотық телімнен Қазақстан азаматтарына таратуға болады. Менің ойымша, біз осыған біртіндеп келеміз. Дегенмен бұл жер телімдеріне коммуникацияларды тарту мәселесі бар. Ол жерлерде жолдар, электр жарығы, су, кәріз жүйесі болған жөн", — деді Әшімбаев.
Осы орайда ол инженерлік желілерге қатысты мәселе бар екенін, бұл бағыттағы тақырыптарды депутаттар көтеріп жүргенін айтты.
"Жыл сайын коммуникацияны тартуға тиісті қаражат бөлініп жатыр, бұл жұмыстар жалғаса береді. Сондықтан кезең-кезеңмен әкімдіктер, Үкімет аталған мәселелерді шешіп, біздің азаматтар қажетті жер телімдерін жеке тұрғын үй құрылысына алады деп санаймын", — деді Сенат Төрағасы.
