Ақылы екпе алғысы келетіндер бар
Қостанай облысының 500-ге жуық тұрғыны Pfizer-ді ақылы түрде салдыруға әзір екенін айтқан. Бұл туралы бүгін, 10 желтоқсанда вакцинация қорытындысы бойынша дәстүрлі брифингте хабарланды.
Денсаулық сақтау басқармасы басшысының орынбасары Анжела Бексұлтанованың мәліметінше, облыста 351 100 адам вакцина алған, бұл – өңір тұрғындарының 67,7% -ы.
«Қазіргі уақытта ревакциналау екі компонентті екпеден кейін 6 айдан соң белсенділігі жойылған вакцинамен жүргізіледі. Pfizer вакцинасы тек жүкті, бала емізетін аналар мен жасөспірімдер үшін әкелінді», – деді спикер.
Бексұлтанованың атап өткендей, бүгінге дейін Pfizer-мен 2 300 жасөспірім, 450 бала емізетін ана және 51 жүкті әйел ектірілген.
«Ал вакцинаның қанша тұратыны және ақылы екпе қашан басталатынын әлі белгісіз. Бірақ оған ниет білдірушілерді тіркеу Қостанай қаласының №1, №4 емханаларында және Рудный қаласының № 2 емханасында жүргізілуде», – деді А.Бексұлтанова.
Облыстағы бас санитар дәрігердің орынбасары Юрий Севостьяновтың айтуынша, аймақта коронавирус инфекциясын 40 мың 638 адам жұқтырған, оның ішінде 4346-сы 14 жасқа дейінгі балалар.
Сондай-ақ індет белгілері 18 жүкті әйелде анықталған, олардың алтауы жансақтау бөлімінде, біреуі ауыр жағдайда жатыр.
