Тіл оқытудың әдіс-тәсілдері
Қостанай ауданындағы тілдерді оқыту базасында облыстық тілдерді дамыту басқармасының ұйымдастыруымен "Қазақ тілін оқытудың тиімді әдіс-тәсілдері" атты семинар болып өтті. Оған өңірдегі барлық тілдерді оқыту орталықтарының оқытушылары қатысты.
– Ежелден сөз қадірін білген, ұққан, маңызды деп санаған, бір ауыз сөзбен бар түйінді шешкен халқымыздың сөйлеу мәдениетін төмендетіп алмай, керісінше, оның мәртебесін жоғары көтеріп, үнемі жетілдіріп, үйлесімді сөйлеуге деген жұртшылықтың талап-талғамын өсіріп отыру – ұлт мәдениеті өркендеуінің, қоғамдық ой-сана дамуының аса маңызды көрсеткіштерінің бірі болып саналады. Сол себептен де қоғамда тіл тұтынушыларының тілді қолдану сапасына, сөйлеу мәдениетінің жоғары болуына ерекше мән беріп отырмасқа болмайды. Семинар барысында тіл мамандары тарапынан қазақ сөзінің үндестік заңы, дауыссыздардың үйлесімі, интонация, сөз әуезінің ерекшеліктері сияқты мәселелерге көңіл бөлінді, – деді бізге облыстық тілдерді дамыту басқармасының бөлім басшысы Бақыткүл Зарлыққызы.
Семинар аясында облыстық тілдерді оқыту орталығының оқытушысы Қ. Ырғызбаева "Қазақ тілін оқытуда интербелсенді тәсілді қолданудың ерекшеліктері", Қарасу ауданы тілдерді оқыту орталығының әдіскері Т. Әлім "Қазақ тілін оқытудағы көркем-әдеби шығармалардың рөлі", Сарыкөл ауданы тілдерді оқыту орталығының оқытушысы Л.Мурсалина "Қазақ тілін оқытудағы саяхат-сабақтың үлгісі", Қостанай ауданы тілдерді оқыту орталығының оқытушысы С.Нұрғазина "Тыңдаушыларға қазақ тілін үйретудегі ұтымды грамматикалық құрылымдар" тақырыптарында оқыту сабақтары бойынша өздерінің әдіс-тәсілдерімен, тәжірибелерімен, инновациялық оқыту технологияларымен бөлісті.
Гүлназым
САҒИТОВА
