Әлеуметтік көмекті кімдер алады?

Өңір басшысы Н.Садуақасовтың қатысуымен өткен кезекті аппарат мәжілісінде Қостанай облысындағы әлеуметтік көмек түрлері туралы айтылды.

Халықтың белгілі бір топтарына – аз қамтылған отбасыларға, мүгедектерге, ҰОС-ның ардагерлеріне әлеуметтік көмек көрсетіледі. Облысымызда мұндай көмектің 23 түрі бар болатын. Қазір олардың дені қысқарып, тек тоғыз түрі ғана қалды. Жергілікті бюджеттен қарастырылатын әлеуметтік көмектің алғашқысы ардагерлерге арналған. Яғни, ҰОС қатысушылары мен мүгедектеріне былтыр 25 айлық есептік көрсеткіш жәрдемақы төленеді. Ал биылғы жылы майдангерлердің әрқайсысына 150 мың теңге көлемінде көмек беріледі деп жоспарланып отыр. Ардагерлер үшін монша, шаштараз қызметі мен коммуналдық шығындарды төлеуге  жеңілдіктер бар.

Әлеуметтік көмек туберкулез ауруына шалдыққандарға төленеді. Бұл көмек облысымыздың барлық қалалары мен аудандарында 15 айлық есептік көрсеткіш көлемінде (27 780 теңге) беріледі. Өрт және табиғи апаттан зардап шеккен тұрғындарға да қолдау бар. Мұндай шара былтыр Таран ауданындағы су тасқынынан соң бекітілген болатын.

– Мүмкіндігі шектеулі жандардың да мүддесі ескерілген. Оларды санаторий және оңалту орталықтарына орналастыру жұмыстары жүргізіледі. Аталған көмек 2012 жылы облысымыздағы төрт ауданда жүзеге асты, – деді облыстық жұмыспен қамту және әлеуметтік бағдарламалар басқармасының басшысы Е.Жаулыбаев.

Қымбат

        ДОСЖАНОВА