Қызыққа толы қала күні

Кешелі бері қостанайлықтар қала күнін ерекше ықыласпен атап өтуде. Түрлі спорттық һәм мәдени шаралар ұйымдастырылып, концерттік бағдарламалармен жалғасып жатыр. Айта кетейік, кеше қала тұрғындарын эстрада әншісі Серік Ибрагимов құттықтап, ән кешін берді. Осы күні «ҚР Тәуелсіздігіне 25 жыл» саябағында мотофристайл шеруі басталды. Күн аяғында «Сиқырлы би әлемі» фестивалі мен лазер шоуы өткізілді.

 

Ал бүгін қалалықтар А.Байтұрсынұлы атындағы алаңға жиылды. Мұнда – мектеп оқушыларының лабиринт ойыны. Бұл уақытта орталықтағы мәдени демалыс саябағында да іс-шаралар қатар өтті. Ән мен жыр байқауының үздіктері анықталды.  

Бизнес орталығының маңына жиналған жұрттың қарасы қалың. Себебі, бұл жерде хот-дог әзірлеуден облыс чемпионаты өтті. Басты талап – 6 минут ішінде 30 хот-дог жасау. Үздік шыққандарға тұрмыстық техникалар тапсырылды.

 

Қала күнінің кешкі бағдарламасы орталықтағы шахмат клубы маңындағы сахнада жалғасады. «Туған күніңмен, Қостанай!» мерекелік бағдарламасынан соң от шашу ұйымдастырылады.

 

Суреттерді түсірген Бердіболат КӨРКЕМБАЕВ.