Журналистер марапатталды

Ақпарат және байланыс қызметкерлерінің күні қарсаңында өткен аймақтық медифорумға Қостанай облысының әкімі Архимед Мұхамбетов қатысты. Шараны газетіміздің бас редакторы Жанұзақ Аязбеков жүргізіп отырды.

– Бүгінде Қостанай облысында 120-дан астам БАҚ тіркелген. Олардың әрқайсысы өз өңірлеріндегі маңызды оқиғаларды тұрғындарға жеткізіп келеді. Атқарушы билік өкілдері де баспа құралдары, телеарналар мен радиолар арқылы қостанайлықтарды толғантқан мәселелерді біліп отыр. БАҚ билік пен халық арасындағы алтын көпір саналады. Сондықтан да Ақпарат және байланыс қызметкерлерінің күнінің маңызы зор. Биыл 1993 жылы қызмет көрсете бастаған «Алау» телеарнасы 25 жылдығын, Таран аудандық «Шамшырақ-Маяк» газеті 80 жылдық мерейтойын атап өтеді. Барша БАҚ өкілдерін төл мерекелерімен құттықтаймын, – деді Архимед Мұхамбетов медиафорумның ашылу салтанатында.

 

Әкім сөзінен соң Елена Төребеков, Татьяна Башкатова сынды ақпарат және байланыс саласының мамандары баяндама оқыды. Сондай-ақ, Астанадан арнайы шақыртумен келген қонақтардың арасында Қанат Әуесбай, Михаил Дорофеев сияқты мамандар бар. Олар жергілікті журналистерге арнап семинар сабағын ұсынды.

Медиафорум Л.Толстой атындағы облыстық кітапханадағы журналистер семинарымен жалғасты. Сарапшылар ақпараттық саясат, ақпараттық контент, интернет порталдардағы мақалалар тақырыптарында дәріс өткізді.

Бүгін еңбегімен еленген бірқатар БАҚ қызметкері облыс әкімінің арнайы сыйлығы мен түрлі алғыс-марапаттарға ие болды. Олардың арасында «Қостанай таңы» газетінің қызметкерлері Хамитбек Мұсабаев, Анжелика Ткаченко, Байбатыр Ахметбеков, Қуаныш Есқабылдар бар. 

 

Суреттерді түсірген Б.Көркембаев