Күн шуағын төккен күн Қостанай шаһарының 135 жылдығы жоғары дәрежеде өтті
Қала күні облыс әкімі жаңа ақшанқан салтанат сарайында серт байласып, алғашқылардың бірі болып некелерін қидырған жас жұбайлар Самат және Айғаным Байжановтарды құттықтады. Отауларының шаңырағы шаттық пен бақытқа бөленіп, қаламызбен бірге көркеюіне тілек білдірді.
Жалпы, мерекеге тоқталар болсақ, қала күні кең көлемде аталып өтілді.
Мерекелік думанға облыс басшысы Н.Садуақасов және қала әкімі А.Ахметжанов қатысты.
Олар орталық саябақ, өлкетану мұражайы, Сити-орталықтағы шаралармен танысып, жұртшылықты мейраммен құттықтады.
Биылғы жылы қала күніне орайластырылған шаралардың сан алуан болғанын айта кеткен жөн. Сондай игі бастамалардың қатарына поэзиялық фестиваль, өңірдің өткен тарихынан сыр шертетін тірі мұражай, бау-бақша өнімдерінің көрмесін жатқызуға болады. Мерекелік думан гүлдер көрмесінен басталды. Мұндағы қарбыз, асқабақ, қиярдан жасалған нарғызгүл, лалагүл мен раушан гүлдері көздің жауын алады. Бұл шараға қатысқан 40-тан астам ұйымның басым бөлігі мектептер мен балабақшалар.
Ал, өлкетану мұражайының ауласындағы тірі мұражай талай көрерменнің таңдайын қақтырды. Онда облыстық қазақ және орыс драма театрларының әртістері мен мұражай қызметкерлері Қостанайдың өткені мен бүгінгі тарихына байланысты қойылымдар қойды.
Сити-орталықта жергілікті "Баян Сұлу" кондитерлік фабрикасының қызметкерлерінің қолынан шыққан шаһардың бас белгі-сіне айналған шоколад мұнарасынан қонақтар мен тұрғындар ауыз тиді. Сондай-ақ, бұл тойға наубайхана иелері де өз тартуын жасады. Сол сәттегі табиғат ананың ерекше мейірімін төгіп, жайма шуақ танытуы орталыққа жиналғандарға ерекше әсер берді. Жұртшылықтың шат-шадыман көңіл-күйі мерекенің сәнін келтіріп, шырайын аша түсті.
Самал Серікқызы,
аспаз:
– Нан қазақ елінің киелі тағамдарының бірі. Өз шаһарымыздың күнінен шет қалмай үлесімді қосқаныма шексіз қуаныштымын. Баршаңызды осынау айтулы мерекемен шын жүректен құттықтаймын. Қостанай қаласының сәулеті жылдан-жылға арта берсін.
Шаһардың 135 жылдық мерекесінде кішкентай бүлдіршіндер де назардан тыс қалмады. Олар үшін арнайы өнер ұжымдары би билеп, ән шырқады. Өздері қатарлы кішкентай өнер жұлдыздарының тартуына дән риза болған сәбилер күлкісі мерекеге шырай бере түсті.
Қала қүніне орай тағы бір ерекше тарту – бұл "Жастар" бульварында орналасқан салтанат сарайының ашылуы.
Жалпы ауданы 1926,6 шаршы метрді құрайтын 2 қабатты ғимараттың бой көтеруіне 374 млн 157 мың теңге жұмсалды. "Тобыл" әлеуметтік-кәсіпкерлік корпорациясының маңызды жобаларының бірі болып отырған нысанды "Сыл" жауапкершілігі шек-теулі серіктестігі салып шықты.
Жаңа сарай ашылған күні 26 жас жұп өз некелерін қидырды.
Айгүл Сейдахметова,
"Орталықтандырылған қалалық кітапхана жүйесі" ММ директоры:
– Қостанай жұртшылығы шаһардың 135 жыл мерей тойын тойлады. Өткен кезеңде Тобыл өзенінің жағасында бой көтерген сәулетті қаламыз күн санап құлпырып, жаңа кейіпке енуде. Бүгінгі қала күні мерекесімен барша жұртшылықты шын жүректен құттықтаймын.
Қостанайдың туған күніне арналған шаралар өзінің ауқымдылығымен дараланды. Той-думан шаһардың барлық аудандарында таңсәріден басталды. Қаланың шет аудандарына арнайы үлкен экрандар қойылып, басты алаңдағы бағдарламалар тікелей көрсетілді. Түс ауа спорттың жұдырықтасу түрінен жарыс өтіп, 
спортшылар өз бақтарын сынады.
спортшылар өз бақтарын сынады.
Мерекелік думанның сәнін облыс орталығының мемлекеттік мекемелері мен жеке кәсіпорындары қызметкерлерінің басын біріктірген шеру келтірді десек артық айтқандық емес. Шеруге қатысушылар соңғы кезде тұрғындардың сүйікті орнына айналған " Шағала" жағалау демалыс саябағынан басталып, Таран, Алтынсарин көшелерінен өтіп, Әл-Фараби даңғылы арқылы облыстық әкімдік алдындағы құрылған сахнаның жанына келіп тоқтады.
Онда жиналған қауымды қала күні мерекесімен облыс әкімі Нұралы Садуақасов құттықтады.
Бұдан кейін өңіріміздің және облыс орталығының дамуына сүбелі үлес қосқан бір топ азаматтарға "Қостанай облысының құрметті азаматы", "Қостанай қаласының құрметті азаматы" атақтарының төс белгісі және куәліктері тапсырылды.
Мерекелік думанның соңы жергілікті және елімізге танымал Батырхан Шүкенов, Өзбекстандық "Ялла" ансамблі, ресейлік Доминик Джокер секілді өнер жұл- дыздарының концертімен жалғасып, соңы от шашумен аяқталды.
Мешіт ҒАЗИЗ.
Суреттерді түсірген
Айбек ЖҮЗБАЙ,
Бағдат АХМЕТБЕКОВ.
