Ортақ іске үлес қос!

Рудныйдың «Достық» саябағында Дүниежүзілік қоршаған ортаны қорғау күніне орай кең ауқымды экофестиваль өтті. Шараны «ССКӨБ» АҚ қаржылай қолдауымен «Жастар» ресурстық орталығы ұйымдастырды.

Фестиваль аясында «Эко-балалық шақ» интерактивті алаңы, фотокөрме павильоны мен экоойындар алаңы жұмыс істеді. Ал саябақтың басты сахнасында Рудный мен Таран ауданы мектептерінен келген экологиялық үгіт-насихат бригадалары өздерінің жалынды ұрандарын айтып, сахналық қойылымдар көрсетті.

Қоршаған ортаны қорғау бойынша оқу жылында атқарылған жұмыстарға есеп берді. Одан кейін командалар көңілді эстафетада бақтарын сынады.

Фестивальдің салтанатты рәсімінде алдымен экологиялық акцияларға үлес қосқан кен алыбының бөлімшелері марапатталды. Ал оқушылар арасында Рудныйлық №7 мектеп-гимназияның «Жерұйық» тобы жеңімпаз деп танылып, оларға сыйлық ретінде танымдық экология және энергоресурстарды қорғау орталығын жабдықтауға сертификат табысталды.

Қуаныш Есқабыл