Мақсат айқын, мүдде ортақ

Қостанайда облыстық ішкі саясат басқармасының ұйымдастыруымен семинар-тренинг өтті. Тақырып – "Рухани жаңғыру – қазақстандық қоғамның бірігуі мен дамуының негізі". Мұнда еліміздің әр жерінен түрлі сала ғалымдары қазақстандық қоғамның қарқыны мен болашағын талқылады.

Семинарды облыс әкімінің орынбасары Марат Жүндібаев ашты. Ол өз сөзінде Қазақстан биылғы жылды оң өзгерістермен қарсы алғанын атап өтті:

-Біз биыл тарихи шешімдердің куәсі болдық. Елбасы Нұрсұлтан Назарбаев аз ғана уақыт ішінде Қазақстанның саяси, экономикалық һәм рухани бағыт-бағдарын айқындап берді. Бұның бәрі кейін өзара қабысып, ел игілігі үшін қызмет етпек. Біз тек осылай ғана «Қазақстан-2050» стратегиясын жүзеге асырып, дамыған 30 елдің қатарына ене аламыз,-деді ол.

Л.Н.Гумилев атындағы Еуразия ұлттық университеті заманауи зерттеу институтының директоры, философия ғылымының докторы, саясат докторы Мұхит-Ардагер Сыдықназаровтың айтуынша: "Мемлекет басшысының әр сөзінде нақты, халықтың көңіліне қонымды дүниелер бар. Оның бәрі азаматтардың жүрегіндегі көптеген сұрақтарға жауап береді, болашаққа деген күдігін сейілтеді", дейді ғалым.

Пікірталас семинардың екінші бөлігінде қыза түсті. Мұнда қонақтар әр сұрақты сала бойынша жеке аудиторияларда талқылады. Ғалымдардың ойы бір арнаға тоғысты. Өйткені мақсат – айқын, мүдде – ортақ. Мемлекеттің көздегені – біртұтас ұлт болып қалу.

 

Суреттерді түсірген Айбек ЖҮЗБАЙ.