Қарамеңді қар құрсауында қалды

Кеше Қостанай облысындағы Науырзым ауданына қарасты Қарамеңді ауылында үздіксіз қар жауып, үйлер құрсауда қалған. Жауған қардың қалыңдығы 3 метрге дейін жетеді дейді тұрғындар. Бұл туралы "Алау" телеарнасы хабарлайды. Ауыл адамдарының айтуынша, мұнда соңғы күндері боран бір басылмаған, күн еш ашылар емес. Ал Қарасу ауданында, тіпті қар үйдің кіреберісін де жауып тастаған. Әзірше ауылдастар бір-біріне қарайласып, қар құрсауынан аман қалуда.

Синиоптиктердің мәліметінше, Науырзым ауданында бір тәулік ішінде 58 сантиметр, Қарасу ауданында 34 сантиметр көлемінде қар жауған. 

Естеріңізге сала кетейік, Қостанай облысында бірнеше күн бойы боран болған еді. Өңірде барлық тас жолдар жабылған болатын. Осы күнге дейін жолаушыларды қар құрсауынан құтқару операциялары жалғасуда. Мамандар бұрқасыннан кейін қатты аяз болады деп болжап отыр. Бүгін барлық трассалар ашық.

Суреттер alau.kz сайтынан алынды