Заманауи жалдамалы үй

Қарабалық ауданының Черемушки шағын ауданында жаңа үш қабатты жалдама үй тұрғындар игілігіне берілді. Кәсіпкер Владимир Кригер іргесін қалаған кең екі бөлмелі пәтерлерге жергілікті жұрт жыл бұрын кезекке тұрып қойған. Жалдамалы пәтерге қоныс тепкен отбасылар дән разы. Соңғы үлгімен салынған үйдің іші кірсе шыққысыз. Еуропалық стандартқа сай. Жайлы, жылы. Салқын-ыстық су келіп тұр, тіпті аспа шамына дейін басқару тетігімен жанып-сөнеді.

Барлық жағдай жасалған үйдің айлық пәтерақысы тұрғындарды алаңдаушылыққа салмайды. Жалдау құны – 30 мың теңге. "Ауданда көнетоз үйлерді жалдап тұру 20-25 мың екенін ескерсек, заман талабына сай бұл пәтерлердің құны қалтаға соққы емес", – дейді тұрғындардың өздері. Бұл – В.Кригердің негізін қалаған екінші үй. Сондай-ақ, кәсіпкер – өзінің қаражатына батыстық типте жалдамалы тұрғын үй салып отырған облыстағы бірегей азамат саналады.