Ел әлеуеті – ауыл шаруашылығында
Бүгін облыс әкімі Архимед Мұхамбетов Қостанай ауданына жұмыс сапарымен барды. Мұнда өңір басшысы ауыл шаруашылығы тауарларының жәрмеңкесіне қатысты. Бұқара халықпен пікірлесті. Тауар бағасын бақылап, жергілікті шенеуніктерге тапсырма жүктеді.
Бір айта кетерлігі, кеше ғана салтанатты түрде өткен ауыл шаруашылығы қызметкерлерінің күнінде Архимед Бегежанұлы өңірдің бүгінгі беталысына тоқталып, шаруа-диқандарды құттықтаған-ды.
Сол игі шарада ол:
-Ауыл шаруашылығы — ел экономикасының маңызды салаларының бірі. Мұнда біздің облыстың үлес салмағы басым. Елбасы Н.Ә.Назарбаевтың үлкен қолдауының арқасында жыл сайын ауылшаруашылығын дамытуға айрықша назар аударылып, қаржы бөлу мәселесі артып келеді.
Осындай айрықша қамқорлықты сезінген облыс шаруалары халықты сапалы әрі қолжетімді азық-түлікпен қамтамасыз етуге зор үлес қосып жүр. Биылғы ауа-райының қолайсыздығына қарамастан өңір диқандары 5 млн. тоннадан астам астық жинап алды. Бұл айтарлықтай жетістік.
Біз алдағы уақытта да ауылшаруашылық саласында жұмыс істейтін еңбек адамдарының лайықты өмір сүруі үшін қолдан келгенше барлық жағдайды жасайтын боламыз,- деп қазіргі қаржы дағдарысына қарамай бұл саланы одан әрі дамыта беру қажеттігін атап өткен еді.
Бүгінгі сапарында да осы мағынадағы пікірлерін айтып, бірнеше өндіріс нысандарын аралап, жай-күйімен танысты.
Бұл туралы толық ақпаратты газетіміздің алдағы сандарынан оқи аласыздар.
Нұрболат МЕШІТБАЕВ,
Суреттерді түсірген автор.
