“Ардагерлерді ардақтайық” акциясы Арқалықта

Қалалық Мәдениет сарайының жанынан жұмыс жасайтын Жастар бастамалар орталығы республикалық «Ардагерлерді ардақтайық!» акциясы аясында соғыс, тыл және еңбек ардагерлеріне қол ұшын созып, көмек көрсету шараларын қолға алды.

 – Ұлы Жеңістің 70 жылдығы қарсаңында игі шараны бастап жатырмыз. Отан қорғау үшін жанын аямаған бүгінгі ардагерлерге қанша құрмет жасасақ та артықшылық етпейді. Себебі, бүгінгі жас ұрпақтың бақытты өмір сүруі қазыналы қарттарымыздың қажырлы еңбегінің арқасы деп білеміз,- дейді орталық жетекшісінің орынбасары Мөлдір Асқарқызы.  

 Акцияның алғашқы күні құрамында Арқалық медицина колледжінің шәкірттері бар ерікті жастар тобы Родина ауылының тұрғыны, еңбек ардагері Қойшыбай Құсбековтың шаңырағында болды. Жастар қарияның ауласын қардан тазартып, үй шаруасына жәрдемдесті.

 Құдайға шүкір Құсбек ата жалғыз емес. Қосағы, балалары мен немерелері бар. Қолұшын созып, қарайласып тұрады. Әйтсе де адамдар арасындағы бауырмалдық, қайырымдылық сынды асыл қасиеттерді айқындайтын мұндай өнегелі шаралардың маңызы зор. Еңбек ардагерлері жастарға өнегелі өмір жолдарынан естеліктер айтып, ақ баталарын берді.

 Ерікті жастар тобы осы бағыттағы жұмыстарын алдағы мамыр айына дейін жалғастыра бермек ниетте.

 

Мұрат Жүнісұлы

Арқалық қаласы