Тоқаевты қолдау штабы құрылды
ҚР Президенттігіне кандидат Қасым-Жомарт Тоқаевтың Қостанайдағы қолдаушылары республикалық қоғамдық сайлауалды штабының онлайн тұсаукесеріне қатысты. Одан соң облыстық қоғамдық сайлауалды штабының тұсаукесері өтті.
Айта кету керек, республикалық қоғамдық штабқа Қостанай өңірінен 6 адам мүше болды.
Сондай-ақ сайлауалды науқанды өткізу үшін Қасым-Жомарт Тоқаевты қолдаушылар 51 сенімді адамнан тұратын облыстың қоғамдық штабы құрылды. Оған «Мәслихаттар депутаттарының бірлестігі» РҚБ, Халықтық-демократиялық партия, «Ақжол» Қазақстан демократиялық партиясы, Қазақстан халқы Ассамблеясы, Қазақстанның Азаматтық Альянсы өкілдері және т. б. кірді.
Өңірлік штабтың басшысы Серік Бектұрғанов мүдделестеріне алдағы саяси науқанда қандай тәртіппен жұмыс істейтінін түсіндірді.
– «AMANAT», «Ақжол» және ХДП сынды үш саяси партия бір кандидатты ұсынып отырғанын білесіздер. Алдағы үгіт-насихат науқанында қоғамдық ұйымдар да бізбен бірігіп жұмыс істеуге ниетті. Уақыт аз қалды, атқаратын шаруа шаш етектен, – деді Серік Бектұрғанов.
Ол сонымен қатар, штаб мүшелерін таныстырып, олардың міндетттерін де айтып өтті. Өңірдегі штабтың басты кеңсесі «AMANAT» партиясының облыстық филиалы ғимаратында болады.
