БАЗАР БАҒАСЫНАН ТӨМЕН

Қостанайда кезекті ауылшаруашылық жәрмеңкесі өтті. Оған 14 аудан мен Қостанай, Рудный қалаларының 150-ге тарта ауыл шаруашылығы тауарларын өндірушілер қатысты. Жәрмеңкеде барлығы 110 тонна азық-түлік сатылды. Тұтынушыларға ұсынылған тамақ өнімдерінің құны базар, дүкен бағаларынан 15-20%-ке арзан. Мәселен, сиыр етінің келісі 1200-1400 теңге, жылқы еті 1500-1600, қой еті 1300-1400, құс еті 700-900 теңгеден сатылымға шығарылды. Жұмыртқа 150 теңгеден басталады. Қанттың бағасы 227 теңге. Картоптың келісі 60-80 теңгеден.

"Біз Науырзым ауданынан 1800 тонна сиыр, жылқы етін әкелгенбіз. Таңертеңгі 10-ға дейін еттің 60%-ін саттық. Баға қарапайым халық үшін қолжетімді болғандықтан, жұрт тез алып кетті, – дейді Науырзым ауданы әкімінің орынбасары Қабидолла Орманов.

Азық-түлік өнімдерінің түрімен танысу және баға саясатын білу мақсатында жәрмеңкені аралап шыққан облыс әкімі Архимед Мұхамбетов өңірлерден келген кәсіпкерлерден тауар өтімділігі туралы сұрап білді.

"Өнімдеріміз жақсы өтіп жатыр. Баға тиімділігі бірден байқалады. Таңертеңнен бері тауарларымызды түгелге жуық сатып үлгердік", – дейді сатушы Сайранкүл Ерниязова. 

Бұл жолғы жәрмеңкеде 22 тонна ет өнімдері, 7 тонна бакалея, 6 тонна макарон өнімдері, 144 000 дана жұмыртқа, 10 тонна қант, 3 тонна сұйық май, 12 тонна картоп, 10 тонна көкөніс және жеміс сатылды.

"Бүгін 207-ші жәрмеңкені өткізіп отырмыз. Онда жалпы құны 1 млрд 200 млн теңгеге бағаланған 2500 млн тонна азық-түлікті сатылымға шығардық. Ең бастысы, бұл жерде орташа баға гипермаркет, дүкендерге қарағанда 15-20% арзан. Алдағы уақытта мұндай жәрмеңкелер тұрақты өтіп тұратын болады, – дейді облыс әкімі А.Мұхамбетов.

 

Айбек Ибраев,

Суреттерді түсірген Бағдат Ахметбеков